Prokuraturadan tenbi alğan qırımtatar faalleriniñ adamlar arasında er angi bulunması uquq qoruyıcı organları temsilcileri tarafından kütleviy merasimni teşkil etüv olaraq sayıla bile ve alâqalı neticelerni ketire bile.
Bu aqta qırımtatar milliy areketiniñ faali Nariman Celâl bildirdi.
«Eñ meraqlısı şu ki, işbu vesiqanıñ metninde endi aytıla ki, prokuraturanıñ elinde olğan malümatqa binaen, biz, nasıldır kütleviy merasimlerniñ iştirakçileri ya da teşkilâtçıları olamız», – dep ayttı Celâl.
Bunen beraber Nariman Celâl qayd etti ki, o ve Lemmar Yunusov, kerçekten de, mayıs 18-de matem merasimlerini teşkil etüv aqqında haber kâğıtlarını bergen ediler, amma bular red etildi.
Onıñ malümatına köre, ondan, İlmi Umerov ve Lemmar Yunusovdan ğayrı, bu kibi tenbilerni Qırımnıñ diger regionlarında yaşağan qırımtatar faalleri de aldı.
Avdetniñ evel bildirgenine köre, mayıs 17-de qırımtatar faalleri İlmi Umerov, Nariman Celâl ve Lemmar Yunusov Qırım prokuraturasına çağırıldı. Bundan da ğayrı, Aqmescit (Simferopol) rayon prokuraturasınıñ hadimleri Avdet gazetasınıñ baş muarriri Şevket Kaybullayevni yaqalavnen qorquzdı, onıñ adına nasıldır İvanov şikâyet mektübini yazdı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
