Bağçasarayda sürgünlik qurbanlarına bağışlanğan hatıra tahtasına keçüv yolu qapatıldı

18.05.201710:45

Mayıs 18 sabası Bağçasarayda hoşsuz bir vaqiadan başlandı. Qırımtatar halqı sürgünligi qurbanlarına bağışlanğan hatıra tahtasına keçüv yolunı içinde Georgiy şeriti olğan avtomobil qapattı.

Bu aqta qırımtatar faali Ayşe Umerova Facebook saifesinde bildirdi.

Onıñ malümatına köre, avtomobil yanında politsiya hadimi nevbet tuta, ve etrafta vatandaş urbalarındaki daa bir qaç uquq qoruyıcı yüre edi.

«10 daqqalıq tartışmalardan soñ maşna bu yerden niayet alındı, ve bizim çiçekler qoymaq ve o facialı vaqialarda elâk olğanlarnıñ ruhlarına dua etmek imkânımız oldı», – dep añlattı o.

Avdetniñ evel bildirgenine köre, mayıs 17-de qırımtatar faalleri İlmi Umerov, Nariman Celâl ve Lemmar Yunusov Qırım prokuraturasına çağırıldı. Bundan da ğayrı, Aqmescit (Simferopol) rayon prokuraturasınıñ hadimleri Avdet gazetasınıñ baş muarriri Şevket Kaybullayevni yaqalavnen qorquzdı, onıñ adına nasıldır İvanov şikâyet mektübini yazdı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.