Qırım mahkemesi müftini sorğuğa çekmek Çiygoznıñ imayesi muracaatını red etti

27.06.201711:35

Qırım Yuqarı mahkemesi qırımtatar faali Ahtem Çiygoz imayesiniñ yarımada müftisi Emirali Ablayevni sorğuğa çekmek muracaatını red etti.

«Qırım.Aqiqat»nıñ bildirgenine köre, toplaşuvda adliyeci Nikolay Polozov Ablayevniñ sorğuğa çekilmesi aqqında şefaat arizasını bergen edi, çünki o, 2014 senesi fevral 26-da Qırım Yuqarı Radası yanında yüz bergen vaqialarnıñ faal iştirakçisi edi.

«Ablayev fevral 26 vaqialarında faal iştirak etti, bundan bir kün evel Meclisniñ (Rusiyede 29.09.2016 mahkeme qararlarınen yasaq etilgen, – Avdet) toplaşuvında iştirak etti. Miting devamında şadırvan parapetinde edi, o yerde halq ögünde dua etti ve bundan soñ anda bulunğanlarğa hitap etti. O, bütün bu meseleler boyunca bizge izaat bere bile. Bundan da ğayrı, Ablayev mahkemeden aldın taqiqat keçirilgen vaqıtta şaat olaraq sorğuğa çekildi, lâkin, belli olmağan sebepten, mahkemede izaat bermek içün taqiqatçı onı şaatlar cedveline kirsetmedi», – dep qayd etti Polozov.

«O, qırımtatarlarnıñ taqdiri boyunca qararlar alğan birinci şahıslardan biri ola. Bu cümleden, fevral 26 vaqiaları arfesinde. Öz statusında bulunıp iştirak etken muzakereler şaraiti, qabul etilgen qararlar. Bütün bularnı añlata bile», – dep adliyecige qol tuttı Ahtem Çiygoz.

Lâkin, prokuror Ablayevniñ sorğuğa çekilmesine qarşı çıqtı, ve mahkeme oña qol tuttı.

Bunen beraber, bu toplaşuvda Polozov Qırım parlamenti spikeri Vladimir Konstantinovnıñ sorğuğa çekilmesi aqqında şefaat arizasını berdi. Mahkeme buña qol tuttı, sorğu iyül 10-da keçirilecek.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası