«Eurovision» halqara yır yarışınıñ teşkilâtçıları Ukrainanı yarışta Rusiyeni temsil etip iştirak etecek olğan Yuliya Samoylovanıñ devletke kirişini yasaq etkeni içün para cöremesinen cezalamaq qararını aldı.
Avropa yayınlav birliginiñ bildirgenine köre, «Kiyevniñ areketleri yarış namına zarar ketirdi. Bundan da ğayrı, Ukrainağa nisbeten, merasimniñ teşkil etilmesini keçiktirgeni içün, para cöremesi belgilenecek.
Aynı vaqıtta, Avropa yayınlav birligi rusiyeli «Birinci kanal»ğa «Eurovision» yarışını yayınlamaqnı red etkeni içün tenbiledi. Haber etilgenine köre, yarış teşkilâtçıları Rusiyeni para cöremesinen cezalamaycaq.
Avdetniñ evel bildirgenine köre, Ukraina Havfsızlıq hızmeti «Eurovision-2017» yarışınıñ iştirakçisi Yuliya Samoylovanıñ devletke 3 yıl müddeti devamında devletke kirişini yasaq etti. Bundan soñ Avropa yayınlav birligi resmiy olaraq ilân etti ki, Rusiye «Eurovision-2017» halqara yır yarışında iştirak etmeycek. Bundan evel Rusiyede er sene «Eurovision» yarışını yayınlağan «Birinci kanal» bunı 2017 senesi yapmaqnı red etti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
