İyül 27-de Qırım Yuqarı mahkemesinde qırımtatar faali Ahtem Çiygoznıñ sorğuğa çekilmesi yekünlendi.
Çiygoznıñ adliyecisi Nikolay Polozovnıñ sözlerine köre, endi taraflarnıñ munaqaşaları keçirilmek kerek, dep bildire «Qırım.Aqiqat».
İmaye tarafı 2017 senesi avgust soñunda – sentâbr başında üküm çıqarılacağını bekley.
«Şimdi diqqatqa alıp olamağanım iç faktorlar olmasa, demek ki, munaqaşalarımız, belki, avgustnıñ ekinci aftası, yani 7-9 künleri, keçirilecek, bundan soñ mahkeme üküm çıqarmağa ketecek. Mahkemeniñ üküm çıqaracağı ne qadar vaqıt alacağını – bir, eki, üç afta ya da bir ay – aytmaq zor. Bayağı deliller baqılğanı köz ögüne alınıp, mahkemeciler ükümniñ nasıldır qaralamasını endi yazğan olsa da, dava bir yıl devam etken soñ eki kün içinde ükümniñ çıqarılması kelişikli degil. Bellesem, olar teneffüs alacaq, ve, tahmin etkenime köre, üküm avgust soñunda – sentâbr başında seslendirilecek», – dep qayd etti adliyeci.
Hatırlatamız ki, Qırımda mahkeme Ahtem Çiygoznı sorğuğa çekmege iyül 25-te başladı, sorğu fevral 25 ve 26 künleri yüz bergen vaqialarnen bağlı edi.
Avdetniñ evel bildirgenine köre, Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
