Tünevin, iyül 31-de, Qırım müendislik ve pedagogika universitetinde Aqmescitteki (Simferopol) Vorovskogo soqağında evel Qalğa-Sultan saray kompleksi ve XV asırğa ait olğan Qırım Hanlığı zamanındaki cami bulunğan yerde qurucılıq meselesi boyunca tögerek masa keçirildi.
Bu aqta onıñ teşkilâtçısı Muhammed Ali Sulaymanov bildirdi.
Merasimde alimler, cemaat erbapları ve memurlar iştirak etti. Tögerek masada bu meseleniñ uquqiy, em de ilmiy-tarihiy tarafları muzakere etildi.
Belgilendi ki, saray bulunğan yerde qurucılıq işleri içün razılıq berilmedi. Devlet mimarcılıq ve qurucılıq inspektsiyasınıñ (DMQİ) reberiyeti kerekli tedbirler keçirdi. Qurucılıqnı alıp barğan müessise bütün qurucılıq işlerini toqtatacaq, dep söz berdi.
«Topraqnı ayırmaq içün uquq tarafından ciddiy qıymet kesme lâzim. Şeer şurası ve DMQİ-ne işbu vaqianıñ uquqiy tarafı tafsilâtlıca ögrenilmesi içün bir afta berildi. Er angi qaide bozuvları belgilense, uquq qoruyıcı organlarına deputat muracaatı yollanılacaq», – dep bildirdi Sulaymanov.
Onıñ sözlerine köre, tögerek masa iştirakçileri bir qararğa keldi ki, başlatılğan qurucılıq toqtatılmaq, temel yoq etilmek ve bu topraq damartısı qurucılıq malzemelerinden boşatılmaq kerek.
Tögerek masada bildirilgen malümatqa köre, arheologik qazmalar içün para «ayırılğan», demek ki, bu teşkil etilmek kerek. Qazmalarnıñ neticelerine baqmadan, QMPU-da Alimler şurası toplaşacaq ve bütün tarihiy vesiqalarnı ögrenecek ve resmiy ilmiy hulâsa çıqaracaq komissiya teşkil etilecek.
«Em teşkilâtçılarğa, em de işlerini taşlap, merasim keçirilecegi aqqında qarar saba saat 10:30-da alınğanına baqmadan, merasimde iştirak etkenlerge teşekkür bildiremiz», – dep minnetdarlıq bildirdi Sulaymanov.
Qırım müftiyatınıñ matbuat hızmeti, yarımada Rusiye devlet qurucılıq nezareti hızmetiniñ yolbaşçısı vazifesini eda etken Nariman İsayevniñ malümatına esaslanıp, bildirdi ki, qurucılıqnı alıp barğan şahsiy müessiseniñ elinde topraq saipligi aqqında vesiqalar bar. Şahsiy qurucılıq içün 1000 kvadrat metrlik üç topraq damartısı 2014 senesine qadar ayırıldı, 2015-2016 seneleri soñki resmiyleştirme yapıldı. Amma qurucılıq içün razılıq yoq.
Qurucılıqnı alıp barğan müessisege nisbeten memuriy qanun bozuvı aqqında protokol tizildi ve qurucılıqnı toqtatma aqqında beyanname berildi.
Avdetniñ evel bildirgenine köre, keçken afta belli oldı ki, Aqmescitteki (Simferopol) Vorovskogo soqağında evel Qalğa-Sultan saray kompleksi ve XV asırğa ait olğan Qırım Hanlığı zamanındaki cami bulunğan yerde qurucılıq işleri yañıdan başlandı.
2015 senesi Qırım müftisi Emirali Ablayev cumhuriyet yolbaşçısı Sergey Aksönovnen körüşken soñ, bu yerde qurucılıq işleri toqtatıldı. Tarihçılarnıñ malümatına binaen, bu yerde orta asırlarğa ait olğan Qalğa-Sultan saray kompleksi, bunen beraber, XV asırda I-ci Meñli Geray tarafından qurulğan cami yerleşe edi.
Avdet gazetası bu mevzuğa bağışlanğan Qırım alimi Nariman Abdulvaap ve tarihçı, «Qırım memleketi» rubrikamıznıñ müellifi Oleksa Gayvoronskiyniñ bir sıra maqalelerini derc etti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
