Ahtem Çiygoz içün mahkeme ükmü ne zaman çıqacağı belli oldı

09.08.201720:31

Qırım Yuqarı mahkemesi Ahtem Çiygozğa 11 sentâbr künü ükmüni çıqaracaq. Bu tarihni «iş malümatlarnıñ büyük miqdarda» olması sebebinden tayin ettiler.

9 avgust künü olıp keçken mahkeme oturışında  taraflarnıñ munaqaşaları soñuna keldi, Ahtem Çiygoz soñki sözünen çıqışta bulundı, bundan soñ mahkeme üküm çıqarmaq içün muşavere odasına ketti, dep bildire «Qırım.Aqıqat»

Avdet haber etkenine köre, Çiygoznıñ advokatı Nikolay Polozov, Qırım Yuqarı mahkemesi onıñ içün ceza olaraq 6-7 yıl qapatılması qararını alacağını tahmin etti.

Hatırlatamız, Çiygoznıñ işindeki prokuror Anastasiya Supryaga ceza olaraq 8 yıl apishane müddetini talap ete. Onıñ sözlerine köre, «mahkeme taqiqatında maznunnıñ qabaatı tolusınen isbatlandı».

Ahtem Çiygoz 2015 senesiniñ yanvar ayından 26 feral 2014 senesinde Qırımnıñ Yuqarı Şura binası ögünde Ukrainanıñ territorial bütünligi desteginen bağlı mitingte iştirak etkeni sebebinden tutuqlanğan edi. Çiygoznı o alıp barğan kütleviy nizamsızlıqta qabaatlaylar.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası