«Artek» Halqara bala merkeziniñ yerinde eski musulman mezarını açtılar – qurucılıq içün meydançıq azırlaylar.
«Kiparisnıy» lageri ve «Gurovskiye kamni» obyekti arasındaki yerde yañı yerleşme obyektlerni qurmağa planlaştıralar. Qurucılarğa atıf etken yerli sakinleriniñ aytqanına köre, anda «Artek»niñ maliyeviy yardımcıları içün kottedjler yerleşecek.
Mında musulman azizlerinden birisiniñ qabiri olğanını iç kimse hatırlamay. İnqılâptan evel Gurzuf-Aziz Qırım musulmanları tarafından eñ itibarlı yer sayıla edi. Bütün yarımadadan mında seyyahlar kele ediler. Mezarlıqta ise ХХ asırnıñ ortasına qadar insanlarnı defin ete ediler.
Bu seneniñ yanvar ayında Yalta cemaatçısı Sergey Sardıko mezarlıqnıñ yoq etilmesi qanuniy taraftan doğrumı dep Qırım medeniy mirasınıñ qoruv Komitetine muracaat etti. Amma bu vaqıtqa qadar memurlar şu musulman mezarlığı saqlanmaq kerekligi aqta ve onıñ bir de bir tarihiy qıymeti olması boyunca iç bir cevap bermediler.
«Artek» lageriniñ rehberleri seesiz şekilde musulman azizi Gurzuf-Aziz defin etilgen qadimiy musulman mezarını yoq etmege başladı. Mezarlarnıñ açıluvınen beraber geodeziya işleri alıp barıla. Mezardaki naaşlar qayda avuştırılğanı belli degildir. Azizniñ de defin etilüv taqdiri belli degil. Çoqusı mezarlar açılğan ve insan naaşları taşlap, qaldırılğan!!! Ne atiqiyatçı, ne qaravullar körünmeyler, bir qaç adımda ise ballarnı qabul etken Artekke ait lager «Kiparisnıy» yerleşe», – dep yazdı içtimaiy ağlarda yerli sakin Natalya Kutsenko. Onıñ qayd etkenine köre, böyle areketlernen «cemaatnıñ qarşı kelmesine baqmadan, «Аrtek» Halqara bala merkeziniñ topraqları utanmadan yañıdan piçile».
Mezarlıqta Qırmızı Kitapqa kirsetilgen terekler kesilüvi ve qabirler bozuluvı aqqında yerli sakinler uquqqoruyıcı teşkilâtlarğa haber ettiler. Amma cevap olaraq añlaşılmağan «yazı» alğanlarını, dep ikâye etti «Krım-naş» («Qırım bizim») cemaat areketiniñ müdiri İgor Barışnikov. Qırım musulmanları diniy idaresiniñ matbuat kâtibi Zera Emirsuin haber etkenine köre, mezarlıqta kene qazuvlar olğanı aqqında idareni kimse haberdar etmedi. Qurucılıq işleri aqqında sualler daa keçken senesiniñ küzünde köterilgen ediler, amma o vaqıt bu yer qurucıllıqqa kirmeycegi ve qoralanacağı, musulman azizine ise abide qoyulacağı añlaşma tizilgen edi. «Biz pek qasevet etmiz ve buña yahşı baqmaymız: bu bir mezarlıqtır. Qırım musulmanlarınıñ diniy idaresi yerli idare bu sualni çezecegine ve mezarlıq yerini qoralanacağına ümüt ete», – ayttı Emırsuin, dep haber ete «Novıy den».
Hatırlatamız, bu seneniñ yanvar ayında Gurzufta «Artek» bala lageriniñ yolbaşçıları «Gurzuf-aziz» qadimiy musulman mezarını yıqmağa başlağanları belli oldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
