Ahtem Çiygözge qol tutıp, öz başına piket keçirgen ve on künge tutuqlanğan 76 yaşlı Server Karametovnı, 19 avgust aqşamı azat ettildi. Qırımnıñ çeşit köy ve şeerlerinden lâqayt qalmağan insanlar onı qarşılamağa keldiler.
Server Karametovnı qarşılamağa qırımtatar faaleri Nariman Celȃl, İlmiy Umerov, Qırım kontakt gruppasınıñ koordinatorı Abdureşit Cepparov ve daa çoqtan çoq insanlar keldiler.
Lilȃ Bucurova özüniñ Facebook saifesinde haber etkenine köre, bazar künü Eski Qırımda (Starıy Krım), Server Karametovnıñ azat etilgeni munasebetinen Özbek han camisinde dua keçirilecek.
Avdet haber etkeni kibi, Aqmescitniñ Jeleznodorojnıy mahkemesi 9 avgust künü, milliy areketniñ faali olğan Server Karametovğa, «polis hadiminiñ emirine boysunmadı», degen qabaatlanuvı sebebinden 10 kün apis cezası berdi.
Hatırlatamız, esli – başlı faalimizge qarşı eki protokol tizilgen edi. Olardan birisi, m. 20.2 Rusiyeniñ Administrativ qanun bozuvları boyunca «öz başına piket keçirme qaidelerini bozuv» olıp, mahkeme Karametovğa 10 000 ruble para cezası berdi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
