23 oktȃbr künü Bağçasarayda yerleşken «Salaçıq» kafesinde plandan tış prokuratura teşkerüvi keçirildi. Bu teşkerüvde Qırım prokuraturası, Rospotreb nezareti, yarımadada çalışqan fevqulȃde nazirligi, bergi hhızmeti ve Devlet qurucılıq nezareti iştirak ettiler.
Bu aqta kafeniñ reberiyeti haber etti.
Bildirilgenine köre, teşkerüvciler qanun ve qararlarnı yer, sanitar, yanğınğa qarşı ve şeer içinde qurucılıq obyektleri saalarında teşkermelerini keçirdiler, dep haber ete «QırımAqiqat».
Kafe memüriyeti bütün kerekli vesiqalarnı taqdim etti. Qanun qoruycılar ise, teşkerüvler 15 noyabrge qadar devam etecegini ayttılar.
Avdet haber etkeni kibi, 11 oktȃbr künü, saba Bağçasarayda «Salaçıq» kafesiniñ saibi Suleyman Asanovda, Seyran Saliyevde, Timur İbragimovde ve Server Zekiryayevde tintüvler keçirilgen edi. Şimdi olar apiste bulunalar.
Qırımda ve Aqyar boyunca çalışqan Rusiyeniñ FSB hızmetinde haber etkenlerine köre, yaqalanğanlar, sanki, Rusiyede yasaqlanğan halqara terroristik «Hızb ut-Tahrir al-İslami» teşkilȃtiniñ iştirakçileri olalar.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
