Ukrainanıñ medeniyet nazirligi, Qırımda Bağçasaraydaki Hanlar sarayında keçirilgen tamirat işlerini toqtatılmasında yardım etmek ricasınen YÜNESKOğa muracaat etti.
«Medeniyet nazirligi UNESCO i ICCROMğa, Rusiye halqara qanunlarnı becerip, Qırımda yerleşken Ukraina medeniyet asabalığına zarar ketirgen, ya da ketire bilecek areketlerden vazgeçmesi emirini yapmasını, isteginen muracaat ete», — dep haber etile nazirliginiñ matbuat hızmetinde.
Ukraina tarafı «milliy degerligi olğan abidede keçirilgen qanunsız işlerge» pek açuvlana. Bu abide Bağçasaraydaki Qırım hanlarınıñ tarihiy paytahtında yerleşe ve YÜNESKOnıñ ögünden tizilgen cedveline kirmektedir. Nazirlik Rusiye temsilcilerine muracaat etip, «halqara aqlarını bozmalarını deral toqtatmaları»nı talap etti.
Avdet haber etkeni kibi, Bağçasarayda yerleşken Hansarayınıñ 16 binasınıñ tamirine 1, 7 million ruble masraf etilecek.
Hatırlataız, Qırım sakinleri, Hansaraynıñ berbad alı aqqında, endi çoqtan haber ete ediler. Mimarcılıq abidesinde çoqtan berli elektrik ağı söndürilgen, binalarda sers ve qaranlıq, saraynıñ damları tökülip başlağandır. Bina endi, çoqtan berli tamiratqa muhtac, kiriş fiyatları ise, er sene paalılaşa. Keçken seneniñ dekabr ayında, fotograf İldar İbragimov, Han saraynıñ alına diqqat etme talabınen Qırım müftiyatına, müzey memuriyetine ve Cumhuriyet akimiyetine muracaat etken edi.
Han saraynıñ eñ degerli ve qıymetli odalarından biri olğan Qırım Giraynıñ altın odası, yıqılğan alda bulunmaqta. Divarlardaki resimler eşilgen, tavanı tökülgen, tabanları alıp taşlanılğandır.
Böyle alda em elçiler, em de qave odaları bulunmaqta. Sıvaması tarihiy töşemege qadar alınğandır. Mındaki töşeme kerpiç, qaburçaq taşı ve kireç taşlarından yapılğandır. Ağaçtan yasalğan esas tiremelerini ise, ağaç qurtı yoq etkendir.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
