«Artek» lageriniñ reberiyeti ve Qırım musulmanlarınıñ diniy idaresi, tapılğan qırımtatar abideleriniñ saqlanıp qalınması aqqında añlaşma imzaladılar.
Hatırlatamız, 2017 senesiniñ yanvar ayında, «Artek» lageri reberiyetiniñ emirine binayen, Gurzufta yerleşken «Gurzuf aziz» mezarlığını yıqp başladılar. İşler başlağan soñ, yerli sakinler akimiyetke muracaat etip, olıp keçken şeylerge izaat bermelerini istediler, amma memurlar keregi kibi cevap berip olamadılar. Bu mezarlıq qorçalanacaq obyektler sırasına kirip, kirmegenini, tarihiy degerligi bar ekenmi, dep aytıp olamadılar. Bu suallernen Qırım musulmanlarnıñ diniy idaresi oğraştı.
Tapılğan artefaktlar esasında imzalanğan añlaşmada, «meydanğa çıqqan arheologik tapmalar, bu cümleden qırımtatarlarnıñ mirasını teşkil etken şeyler, qorçalanmaq kerek, ve ihtiyac olsa müzeyefitsirovaniya yapıla bile», dep qayd etile.
«Artek» bu memorial yerni abadanlaştıracaqve «XVIII – XIX asırlarına ait Magometan mezarlığı», degen işaret yerleştirecek.
Musulman mezarlığınıñ meydanı, «Artek» lageriniñ territoriyasından ziyadedir, onıñ içün bu yerde, tarihiy – medeniy yerler, dep işaret qoyulacaq.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
