İyül 6-da Qırım Yuqarı mahkemesi «Çiygoznıñ işi» boyunca nevbetteki toplaşuvda Qırımdan rusiyeli senator Olga Kovitidini sorğuğa çekti.
Başta Kovitidiniñ sorğuğa çekilmesi saat 12:00-ge planlaştırılğan edi, amma o, bu vaqıtqa kelmedi, bunıñ içün sorğu başqa vaqıtqa keçirildi.
Adliyeci Nikolay Polozovnıñ sözlerine köre, sorğuda Kovitidi noqta-i nazarını pek aydın şekilde bildire edi.
«O, bergen delillerinde er şeyni qarıştırdı, ve, bellesem, üküm temeline bu deliller qoyulsa, üküm yañlış olacaq. O, ayttı ki, Yuqarı Şura merkez kirişi üstündeki balkonda bulunıp, o, merkeziy qapnıı adamlar yıqqanını kördi, amma merkeziy qapını kimse yıqmağan edi. Onıñ bunı körmege imkânı yoq edi – merkeziy qapı saçaq tübündeki oyuğında buluna, o yerde yedi metr bar. Ekinciden: o, Ahtem Çiygoznı başqa insannen adaşıp, onı başqaca tasvir etti, sanki onıñ başında qalpaq, elinde ise ses yanğıratqıç edi», – dep ayttı Polozov «Radio Svoboda» mühbiri Anton Naumlükke bergen izaatında.
Adliyeciniñ sözlerine köre, Kovitidiniñ Ahtem Çiygoz qabaatlanğan şarait aqqında iç haberi yoq.
«Onıñ yekâne körgen şeyi – Ahtem Çiygoz ses yanğıratqıç vastasınen qırımtatar tilinde bir şeyler aytqan edi, amma bu tilni añlamay, ve adamlar bundan soñ tecavuziy ve faal şekilde areket etmege başladı. Amma o, mahkemege tasvir etken insannıñ körünişi Ahtem Çiygoznıñ o kün körünişinden farqlı ola… Bir arada mahkemeciler az qaldı külecek edi, soñunda körüne edi ki, olar, diñlegen açıq yalandan boldurdı», – dep ayttı Polozov.
Qırımtatar faali Ahtem Çiygoznıñ işi boyunca mahkeme ceryanında tahminen 200 adam sorğuğa çekildi. Olardan tek bir kişi Çiygozğa qarşı deliller ketirdi. Qalğanlar, göñülli halq quvetleri azaları bile, mahküm etilgenge qarşı iç deliller ketirmedi.
iyül 5-te mahkeme Çiygoznıñ imayesiniñ Qırım müftisi Emirali Ablayevni sorğuğa çekmek muracaatını ekinci sefer red etti.
Hatırlatamız ki, iyül 10-da mahkeme Qırım parlamenti spikeri Vladimir Konstantinovnı sorğuğa çekmege planlaştıra.
Avdetniñ evel bildirgenine köre, iyün 28-de Qırım Yuqarı mahkemesinde yarımada milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ yolbaşçısı Zaur Smirnov qırımtatar faali Ahtem Çiygoznıñ işi boyunca şaat olaraq sorğuğa çekildi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
