Qırım mahkemesi «Çiygoznıñ davasına» Çubarovnıñ delillerini qoşmadı

01.08.201714:41

Qırım Yuqarı mahkemesi qırımtatar milliy areketiniñ faali Ahtem Çiygoznıñ davasına Qırımtatar Milliy Meclisi (Rusiyede 26.04.2016 mahkeme qararınen yasaq etilgen) reisi Refat Çubarovnıñ sorğuğa çekilmesi malümatlarını qoşmasını red etti.

Bu aqta adliyeci Nikolay Polozov video muracaatında añlattı.

«İmaye tarafı, üküm çıqarılmasına mania olğan hatalarnıñ yoq etilüvi içün, qabaatlav neticesini prokurorğa qaytarılması aqqında şefaat arizasını berdi, işbu şefaat arizası red etildi. Bunen beraber, mahkeme Refat Çubarovnıñ sorğuğa çekilmesi boyunca protokollarnı qoşmaqnı red etti, bundan evel imaye tarafı Çubarovnıñ davet etilüvi ya da onıñ sorğuğa çekilmesi boyunca protokollarnıñ davağa qoşulması aqqında şefaat arizasını bergen edi», – dep bildirdi adliyeci, avgust 1-de keçirilgen toplaşuv aqqında ikâye etip.

Adliyeci haber etti ki, dava boyunca mahkeme taqiqatı yekünlendi, avgust 7-de tartışmalar keçirilecek, dep bildire «Qırım.Aqiqat».

Hatırlatamız ki, iyül 31-de Ahtem Çiygoznıñ davası boyunca 150-nci mahkeme toplaşuvı keçirildi.

Avdetniñ evel bildirgenine köre, mayıs 15-te Refat Çubarov Ahtem Çiygoznıñ işi boyunca mahkemede sözde bulunmaq içün Qırımğa kelmege azır olğanını ilân etti. Bundan soñ Qırım Yuqarı mahkemesi imaye tarafınıñ bu şefaat arizasını qanaatlendirmedi.

Hatırlatamız ki, rusiyeli uquq qoruyıcılar Çubarovğa nisbeten Rusiye Federatsiyasınıñ topraq bütünligini bozmaq çağıruvlar aqqında madde boyunca cinaiy işni baqa. 2015 senesi oktâbr ayında Qırımda mahkeme Çubarovnıñ ğıyabiy şekilde yaqalanuvı aqqında qarar çıqardı, bundan soñ o, halqara qıdıruvğa ilân etildi.

Ahtem Çiygoz 2014 senesi fevral 26-da Qırım Muhtar Cumhuriyeti Yuqarı Radası yanında Ukraina topraq bütünligi içün keçirilgen mitingde iştirak etkeni içün 2015 senesi yanvar ayında yaqalandı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası