İslâm-Terek (Kirovskoye) köyündeki bala meydançığında facialı şekilde rahmetli olğan küçük Rudemniñ ana-babası iç te özüne kelip olamaylar.
Avdet bildirgenine köre, 24 iyül pekitilmegen madeniy salıncaq yapısı sekiz yaşlı oğlançıq üstüne tüşti. Balaçıq yaralar neticesinde rahmetli oldı.
Faciağa bir de bir alâqası olğan insanlar taziye bildirmek içün Ablayevlerniñ evine kelmediler. Bundan da ğayrı, oğlançıqnıñ babası – Rüstem Ablayev aytqanına köre, qara qalpli adamlar olıp keçken faciada balanıñ ana-babasını qabaatlaylar. Balanı baqmaq kerek olğanını aytalar.
Adam, balaçıq rahmetli olğan çoqqatlı evniñ azbarında iyün ayında yañı meydançıq açılğanını ayttı. Eski yapını ise – daa sovet zamanında ağır madenden yapılğan salıncaqlarnı kesip, tek çetke çekkenlerini beyan etti.
O bazaertesi künü küçük Rudem doğmuş ve ekidoğmuş ağalarınen beraber azbarğa çıqqanlar. Ballar oyun içün tamam şu maden obasını seçkenler.
Ağalardan birisi sınğan salıncaqlarda sallanmağa başlağan, Rudem ise yanında turıp, dondurma aşay eken. Apansızdan salıncaq sarsınıp, balaçıqnıñ üstüne tüşken. Salıncaq balanıñ başına urunğan, bunıñ neticesinde bala pek yaralandı. ‘Komsomolskaya pravda – Krım’ haber etkenine köre Rudem hastahanege ketirilip, bir qaç daqqa soñ can bergen.
‘Ne içün salıncaqlar tura edi? Demek ki, mında gecelernen raatlanğan gençler, olarnı yerden köterip, qoydılar. – Rüstem Ablayev kendi fikirini bildirdi. – Amma adamlar yaşağan evler yanındaki tertipni birisi közetmek kerek. Oğlum ölgen yerden yüz metr uzaqlığında mesken-kommunal kontorasınıñ ofisi yerleşe, köy şuramız da bar. Yani ne içün sınğan salıncaqlar 25 kün azbarda yata edi?! Rudemniñ ölüminden soñra tehnika da, adamlar da tapıldı, er şeyni alıp çıqardılar, cıyıştırdılar…’
Kederli baba ölgen Rudem yahşı oquğanını, üçünci sınıfqa tek bir ‘dört’ baasınen keçkenini, arabça bilgenini ayttı.
‘İç tanış olmağan insanlar bizge taziyelerni bildireler, amma faciağa bir de bir alâqası olğan insanlar, iç te evimizge kelmediler. Demek ki, o insanlar özlerini qabaatlı olğanını añlarlar dep qorqalar. Kederimiz öyle de pek büyük, köyde ise birileri biz özümiz qabaatlı olğanımıznı, balanı baqmaq kerek ekenimizni dep öşekler darqatalar. Amma oğlanlar adamlar yaşağan, çoqqatlı evniñ azbarında, adamlar çoq olğan yerde keze ediler’, – dep ayta Rüstem Ablayev.
Köydeki yañı bala meydançığınen arac-mezatta 1 million 300 biñ ruble lotını qazanğan ‘Dikom’ şirketi oğraşqan. Amma olğan faciada şirket öz qabaatını körmey.
‘Salıncaqlarnıñ yıqmasında biz iştirak etmedik. Biz tek öz donatmalarımıznı qoymaq kerek edik, eski şeyerge alâqamız yoq edi,’ – gazetacılarğa şirkette haber ettiler.
Olıp keçken qaza ile yaqın olğan ‘Çistota i poryadok’ Munitsıpal Unitar Müessise ofisine telefon açıluvı istenilgen neticege ketirmedi. Yolbaşçısı İgor Noskov pek meşğül eken.
Taqiqatçılar Rudem Ablayevniñ ölüminen bağlı ‘Muqaytsızlıq neticesinde sağlıqqa ağır zarar bergen, ya da insannıñ ölümine ketirgen’ maddesi boyunca cinaiy işni açtılar. Bu madde boyunca insanlarnıñ belli bir vazifelerde çalışmaq izini olmay ve 5 yılğa qadar mecburiy işlernen cezalana, ya da 3 yılğa qadar belli bir faaliyet ile oğraşmağa mümkün olmay, ya da bularsız.
Hatırlatamız, Keriç sakinleri şeerniñ bala meydançıqlarında yaqında qoyulğan yapılar yaramay pekitilgeni içün ve er an balanıñ ağırlığından tüşebilecegine çorlanalar.
Avdet rahmetli olğan Rudemniñ ailesine taziyelerini bildire. Allah rahmet eylesin!
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
