Qırım Yuqarı mahkemesi qırımtatar faali Remzi Bekirovnıñ içtimaiy ağda beyanatı içün memuriy qaide bozuvı aqqında mahkeme qararlarına qarşı şikâyet arizasını lâğu etti.
«Apellâtsion şikâyet arizasında Aqmescit rayon mahkemesiniñ qararı ne içün lâğu etilmek kerek olğanı aqqında deliller ketirilgen. Qayd etile ki, memuriy protokol tizilgende içtimaiy ağdaki bu saife Bekirov tarafından endi silingen edi. İşbu qaide bozuvı, eger olğan olsa da, içtimaiy ağda saifeniñ silinmesinen bitti», – dep izaat berdi Bekirovnıñ imayecisi Elvina Semedlâyeva.
Avdetniñ evel bildirgenine köre, mart 30-da Ekstremizmge qarşılıq merkezinde yaqalanğan qırımtatar faali Remzi Bekirov Vkontakte içtimaiy ağında eki videonı paylaşqanı içün mahküm etilgen edi: «Primorskoye partizanları» ile intervyu ve «Qara qırğıylar» FSB-nı patlata». O, videolarnı sanki 2009-2010 seneleri paylaştı, protokol ise, mart 30-da tizildi. Bundan da ğayrı, video paylaşılğan saife Remzi Bekirov tarafından silingen edi. Neticede Remzi Bekirov üç kün memuriy yaqalavnen cezalandı.
Remzi Bekirov «Hizb ut-Tahrir» işi boyunca yaqalanğan Teymur Abdullayevniñ evinde talaqanı (cemaat yardımı) teşkil etken edi.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
Foto: Qırım.Aqiqat
